Baro a hotel, nabendisionan

VIGAN CITY – Maysa manen a kabarbaro nga otel ditoy siudad ti nabendisionan itay Mayo 7 kabayatan ti panangrambak daytoy siudad iti Viva Vigan Binatbatan Festival of the Arts.

Masarakan iti Gov. A. Reyes Street, ken binangon ti Nueva Segovia Consortium of Cooperatives (NSCC), mainayon ti NSCC Vigan Hotel kadagiti baro nga otel a kasla uong a nagtubo iti siudad ti Vigan gapu iti panagbalinna a paborito a destinasion dagiti turista iti Amianan kalpasan ti pannakailistana iti UNESCO kas heritage site ken iti panagbalinna itay nabiit a New7Wonders City of the World.

Sakbay daytoy, binangon ti nasao a consortium dagiti kooperatiba ti NSCC Plaza iti poblacion ti Caoayan, Ilocos Sur a maysa itan a paborito a pagdagusan dagiti turista iti ruar ti Vigan City.

Ni Cardinal Juan Quevedo, ti pundador iti NSCC idi isu pay ti arsobispo ti Nueva Segovia.#