Baro a kaso ti Covid-19 positive iti Ilocos Sur, nairakurak

VIGAN CITY — Adda tallo a baro a kaso ti nagpositibo iti Coronavirus 2019 a taga-Ilocos Sur a nakompirmaran kalpasan a naala ti resulta ti swab test-da.

Dayta ti inrakurak ni Gov. Ryan Luis Singson iti nagsaruno a pannakiumanna iti media mainaig iti update ti Ilocos Sur Covid-19 Provincial Action Center.

Natakuatan a nagpositibo iti Covid-19 ti lalaki a guardia a taga San Ildefonso, Ilocos Sur. Naammuan a ti pasiente ket awanan ti travel history a rimmuar iti probinsia. Na-quarantinen ti pasiente ken dagiti kabbalayna ken naalandan iti swab test ken neggatiboda. Naisayangkat metten ti lockdown iti Brgy. Ibuy ken contact tracing kadagiti nakalangen ken naka-denna ti pasiente.

Ti maikadua a baro a nagpositibo iti Covid-19 ket commissioned officer ti Philippine National Police a nakadestino iti Provincial Office. Nairakurak a naggapu ti polis ken kakaduana sadiay Metro Manila para iti opisial a panggep. Na-quarantinen ti pasiente ken dagiti kakaduana a polis.

Isuda dagiti nagsaruno a nagpositibo iti Covid-19 iti maikadua a lawas ti Hulio, ket isuda ti maikalima ken maikanem a kaso iti Ilocos Sur.

Maikatlo a nagpositibo ti maysa a lalaki a taga-Candon. Naammuan a drayber isuna iti bus a tagatulod kadagiti returning overseas Filipino workers ken local stranded individuals iti Ilocos ken addan travel history iti NCR, Bicol, Tarlac, Abra ken Ilocos. Inrakurak daytoy ni Gov. Singson iti Facebook idi rabii ti Hulio 18.

Kiniddaw ni Gov. Singson kadagiti umili ti agtultuloy a panangsurotda kadagiti nayetnag a health protocols kas ti panagaruat ti facemasks, social/physical distancing ken regular a panagbuggo iti ima ken panagusar iti alcohol wenno sanitizer tapno malisian ti pannakaakar iti virus.

Nagpalagip pay nga agtultuloy met latta ti pannakaipakat ti curfew manipud iti alas-8 iti sardam, malaksid kadagiti adda-pagtrabahuanna a manipud iti alas-10 iti rabii, agingga iti alas-5 iti bigat

Kiniddawna met kadagiti rummuar ken sumrek iti Ilocos Sur ti panangsurotda kadagiti nayetnag a pagannurotan kas ti panang-secure-da kadagiti dokumento nga “authority to travel” manipud iti Philippine National Police ken health clearance manipud kadagiti municipal/city/provincial health officers.

Indariragna a nasken a dagiti agawid wenno agsubli iti Ilocos Sur a naggapu iti sabali a lugar nangruna kadagiti adu ti nagpositibo iti Covid-19 ket nasken nga agdalanda iti 14 nga aldaw a quarantine tapno mapatalgedan iti saan a pannakaakar dagiti kabbalay ken makapulapolda.

Napalagipan pay dagiti saan nga autorisado a rummuar kadagiti pagtaenganda kas kadagiti senior citizens ken dagiti agtawen iti nababbaba ngem 21 nga awan ti napateg unay a papananda ket liklikanda pay laeng ti mapan kadagiti pangpubliko a lugar.

Nakiddaw ti panagan-anus dagiti taga-Ilocos Sur kadagiti laklak-amenda nga adu a rigat gapu iti pandemia ken maisaysayangkat a community quarantine.

Impalgak ni Gov. Singson a makapalag-an ti rikna ken mangparegta kadagiti frontliners ta amin a nagpositibo iti naglabas ket naimbagandan iti pannakaakarda iti Covid-19.

Inaklonna a makapapigsa iti pakinakem ta iti intero a Region I ket ti Ilocos Sur ti kabassitan pay laeng ti nagpositibo iti Covid-19, ken addan iti naluklukay a community quarantine.

Impeksana ti namnamaenna a mapalukayanton ti community quarantine no malapdan ti panagraira ti virus iti probinsia babaen ti panagtulnog dagiti umili kadagiti amin a pagannurotan ken health protocols.

Impasingkedna pay ti panangtulong ti Provincial Government kadagiti OFW ken local stranded individuals nga agawid wenno agsubli iti Ilocos Sur, ngem nasken nga agdalanda latta iti quarantine. Pinatalgedanna a nakasagana dagiti quarantine facilities ti Ilocos Sur Provincial Hospital – Gabriela Silang General Hospital ken dagiti sangana nga ospital kadagiti nagduduma nga ili. ti Ilocos Sur. ●