Footer

Baro a Liderato iti PNP

MADALUSAN ngatan ti namantiaan nga imahe ti Philippine National Police kalpasan ti panangsukaten kas PNP Chief ni Director General Oscar Albayalde, sigud a hepe ti National Capital Region Police Office, ken ni nagretiron a Dir. Gen.  Ronald dela Rosa a nagakemen kas Director ti Bureau of Corrections?

Dinutokan ni Presidente Rodrigo Duterte ni Albayalde a mangidaulo iti PNP gapu ti impakita ti heneral a kinaistriktona kadagiti pasurotna kabayatan ti panangidaulona ti NCRPO. Saan a kas kadagiti nagkauna a nagbalin a PNP Chief a sakbay a nadanonda ti kangatuan a rangko ket nalatakdan iti publiko ken napigsan ti kapetda kadagiti politiko. Saan met a kas ken ni Dela Rosa ken dadduma pay a nangato nga opisial ti gobierno, ni Albayalde ket saan a pulos a nadestino sadiay Davao City wenno Davao Region.

Nangrugi a naglatak ni Albayalde kabayatan ti administrasion ni Duterte ken panag-Chief PNP ni Dela Rosa a kaklasena sadiay Philippine Military Academy Class 1986. Sakbay a nag-director iti NCRPO, nagakem nga Executive Officer iti Directorate for Plans sadiay Camp Crame. Nagpaay pay a Provincial Director ti Pampanga Police Provicial Office, ken nasukatan idi 2014 kabayatan ti anti-illegal drugs peration iti ili ti Mexico a nasakupanna. Tubo ti San Fernando, Pampanga. Agretironto inton Nobiembre 8, 2019 a pannakadanon iti tawenna a 56.

Naglatak ni Albayalde kabayatan ti panangidaulona iti NCRPO ken kainget ti pannakaisayangkat ti Oplan Tokhang ken Oplan Double Barrel iti Metro Manila a naipadamag a lugar a kaaduan dagiti nagbalin a biktima ti human rights violations.

Iti laksid ti nakaro a kritisismo iti PNP gapu kadagiti mapapati a human rights abuses ken illegal nga aktibidad dagiti dadduma a polis, impakita ni Albayalde ti kinaistriktona iti panangdisiplinana kadagiti pasurotna. Nasansan dagiti kellaat a panangisayangkatna iti inspeksion kadagiti kalsada ken presinto.

Nabuya iti telebision ken social media ti panagung-unget ni Albayalde kadagiti babaenna a polis a matmaturog ken agiinum iti arak kadagiti estasionda kabayatan a naka-duty-da, ken dagiti agtungtunganga ken ages-cellphone iti igid ti kalsada kabayatan ti pannakaangay iti Pilipinas iti Association of South East Asian Nation Summit.

Nabigbig ni Albayalde iti panangparillebona kadagiti nasurok a 1,000 police personnel ti Caloocan City Police Force kabayatan dagiti nagsasaruno a kontrobersia a nakainaiganda nangruna iti pannakapapatay dagiti dua a barito kabayatan ti police operations.

Pinarillebuanna pay ti hepe ti Caloocan City Police ken Manila Police District Station 11 gapu iti saanda a pannakasolbar kadagiti nagsasaruno a krimen iti masakupanda. Inikkatna pay iti puesto ti Quezon City Police District Station 10 commander gapu iti kinarugit ti estasionna.

Iti panangdutok ni Duterte ken ni Albayalde a mangidaulo iti 170,000 a puersa ti polis, immandar ti Presidente ti pannakapainget ti internal discipline iti PNP, pannakapasayaat dagiti detention cells ken pannakaituloy ti kampania kontra illegal a droga.

Nasken laeng a maikkan ti prioridad ti pannakapainget ti disiplina dagiti polis ta iti laksid ti maibanbando nga internal cleansing iti ahensia ken pannakaingaton ti sueldoda ket agtultuloy latta ti kaadda dagiti police scalawags a mangdaddadael iti imahe ti PNP.

Nagadu dagiti napasamak a kontrobersia iti PNP manipud pay idi nabukel idi Enero 29, 1991 idi napagtipon ti Philippine Constabulary ken Integrated National Police a mayataday iti Republic Act No. 6975 of 1990. Iti agdama nga administrasion, innaganan ti Presidente dagiti lima a police general nga adda pannakainaigna iti illegal a droga. Naduktalan pay dagiti polis a nainaig iti Oplan Tokhang for Ransom a nakapapatayan ti negosiante a Koreano sadiay mismo nga uneg ti Camp Crame. Natakuatan pay dagiti polis a mismo nga agus-usar ken agilaklako kadagiti illegal a droga a natiliwda.

Sakbay iti ipapanawen ni Dela Rosa kas PNP Chief, maysa manen a nadagsen a kontrobersia ti timmaud maipapan iti PNP kalpasan nga adda dagiti agdama ken retirado nga opisial ti PNP Special Action Force ti nagipila iti kaso a Plunder ken Malversation of Public Funds iti Ombudsman ken ni sigud a SAF Chief Director Benjamin Lusad, hepe ti Directorate for Police Operations ti Southern Luzon, ken tallo a babaenna a da Sr. Supt. Andre Dizon, SPO2 Maila Bustamante ken SP01 Jack James Irica  gapu iti saanda a panangited iti naurnong a P59-million nga Additional Subsistence Allowance dagiti agarup 4,000 SAF troopers.

Inaklon ni Dela Rosa iti media a nasinged kenkuana ni Lusad ken ibilangna kas savior wenno taga-isalakanna idi kadeteda pay iti PMA no gandaten idi a dangran dagiti upper-class-na a kaklase ni Lusad iti Class 1985. Impasingkedna met nga addan ken ni Albayalde ti pannakaituloy ti imbestigasion iti kaso ni Lusad.

Sakbay a nakapagakem ni Albayalde kas PNP Chief ket agur-urayen ti dakkel a karit kenkuana no kasano a dalusanna ti mantia ti imahe dagiti polis. Makita ita no kasano ti kinaserioso ti liderato ti PNP ken ti gobierno iti panangdalus kadagiti PNP scalawags. Mapaneknekan itan no kasano a matratar ti kaso ni Lusad ket no agpayso dagiti maipabpabasol kadakuada ket rumbeng laeng a lak-amenda ti bunga ti inaramidda.