Footer

Baro a lokal a channel iti cable TV, naglukat

VIGAN CITY – Nangrugi itay nabiit ti maysa a baro a local channel ti telebision tapno agserbi kadagiti agbuybuya nga Ilokano.

Napirmaan ti kontrata iti nagbaetan ni Christopher Unciano, CEO ti Around Ilocandia (AI) Channel ken ni Sharon Cortez, General Manager ti Eagle Vision Cable System para iti pannakabuya ti AIC iti Channel 8 iti cable TV idi Hulio 10, 2010.

Nailanad iti kontrata nga agaramid ti AIC kadagiti programa a maipabuya babaen ti panangiyere ti nadakamat a cable company.

Segun ken ni Unciano, naglukat ti AIC tapno daytoy ti mangiyopresir iti alternatibo a pakaammuan iti impormasion ken paglinglingayan babaen kadagiti up to date a current events programs ken de kalidad a pelikula nga ipabuya ti channel. Mangipaay pay daytoy iti nababa ti presiona nga advertisement rates para kadagiti mayat a mangipakaammo iti negosio, produkto wenno serbisio nga ipapaayda tapno makaguyugoyda iti klienteda.

“Nainaw ti AIC a mangipaay iti balanse ken awan idaddadumana a panagirakurak ken surotenna ti linaon ti Journalists’ Code ti Pilipinas ken ti linaon ti Journalist’s Creed,” kinuna ni Unciano.

Madama itan ti test broadcast ti estasion ket manamnama a mairugi ti naan-anay nga operasionna inton Agosto.

Para kadagiti mayat nga agpaanunsio, mabalinda a pasiaren ti opisina ti AIC iti Salcedo St. Barangay III, Vigan City wenno kontaken iti telepono bilang (077) 722-2343; cellphone bilang 0917-459-3410 wenno ag-email iti [email protected].#