Baro a nangpaltog lelong, lelangna, nakasuan

SAN ILDEFONSO, Ilocos Sur – Nakasuan ti maysa a baro gapu iti mapapati a panangpaltogna a puon ti nakatayanda iti lelong ken lelangna idi agsapa ti Agosto 26 sadiay Barangay Poblacion, ditoy nga ili.

Nakasuan iti parricide ni Joseph Natividad, Jr., 25, gapu iti panangpaltogna a nakatayanda da Jose Natividad y Gaerlan, 80, ken ni Natividad Natividad y Go, 79, agpada a residente iti Barangay Poblacion ditoy nga ili.

Apaman a nakaawatda iti report mainaig iti nasao ngab insidente, nagresponde dagiti polis ket nadatnganda dagiti agassawa a Natividad a nadigos iti dara iti suelo ket intarayda dagitoy iti ospital ngem awanen ti biag ti lakay idinto a grabe ti kasasaad ti baket.

Segun ken ni Leonel Miniano, 16, kasinsin ti suspek, madama ti panag-chargeda iti selponda iti asideg a tienda idi makangegda iti kanalbuong ngem dida intaltalek.

Kinuna met ni Trevor Mendoza ken Vincent Pati, iti agarup 10:40 iti dayta a rabii, nalabsanda ti suspek a magmagna iti rangtay iti Barangay Gongogong ket insakayda nga intulod iti Partas terminal.

Nakasarak dagiti inbestigador iti maysa a kapsula manipud iti cal. 45 iti nakapasamakan iti krimen.#