Baro a PD, ituloyna programa ti sinuktanna

VIGAN CITY – Kinuna ti kabarbaro a regional director ti kapolisan nga epektibo dagiti programa nga insayangkat ni P/C Supt. Leopoldo Bataoil para iti PROI isu nga ituloyna dagitoy.

Impatalged daytoy ni PNP Regional Director Police  Chief Supt. Romeo Hilomen bayat ti ibibisitana iti opisina ni ni Governor Deogracias Victor Savellano idinto a kinunana a Dagitoy a programa ti sinuktanna ti namagbalin a multi-awarded PRO iti napalabas a dua a tawen.

 Inkari ni Hilomen nga awan ti realignment dagiti opisial ti PNP iti Region I iti uneg ti sumaruno a dua a bulan.

“No la ketdi napintas ti performanceda,  agtalinaedda iti puestoda agingga nga agpaso ti termino dagiti mayor/gobernador a masakupanda tapno adda continuity ti trabahoda, ” kinuna ni Hilomen.

Tutokan pay ti RD ti pannakasolbar dagiti krimen a pakaus-usaran ti agduduma nga armas ta dagitoy ti makitana a nangato iti crime map ti rehion. (Mancielito S. Tacadena/ NBN Vigan)