Tawid News Magazine

Baro a tawen, gubuayan ti baro a namnama

ITA nga aldaw, Enero 4 ti umuna a Lunes ti Tawen 2021, opisial a panangrugi ti trabaho kadagiti publiko ken pribado a sektor ket nasken nga iyusuat ti trabaho ita a tawen a napudno ken napnuan iti responsibilidad tapno agbunga ti nasayaat dagiti igannuat a plano ken tarigagay.

Nasken ti positibo a panangirugi ti 2021 tapno sumayaat ti kasasaad kalpsan ti madagsen a panagbiag iti naglabas a 2020 gapu ti pandemia ti Coronavirus 2019, ken agingga ita ket agtultuloy ti pangta daytoy a virus a nangkettelen iti nasurok a 1.5 million a tattao iti ontero a lubong.

Ditoy Pilipinas, nadagsen unay ti agdama ken naglabasan a biag dagiti adu a Pilipino nangruna dagiti napanglaw ken dagiti nagbalin a biktima ti Covid 19 ken dagiti nagsasaruno a natural a didigra ken kalamidad nga uray iti sakbay ti panawen ti Paskua ken panangpasungad iti Barp a Tawen ket adda dagiti nagbalin a biktima ti bagyo ken layus. Adu dagiti namatayan iti kapamilia ken naawanan iti pagtaengan gapu kadagiti nagsaruno a bagyo.

Nadegdegan pay ti rigat dagiti adu nga umili gapu kadagiti agtultuloy a panagraira ti kurapsion, illegal a droga ken nagduduma a krimen, ken pinakaro ti nalabes a panagpipinnolitika dagiti opisial ti gobierno. Imbes a dagiti pondo nga usaren koma a pangtulong kadagiti tattao ket ibulbulsa laeng dagiti sumagmamano nga agserserbi iti gobierno.

Naindaklan a pagyamanan dagiti tattao ti sangalubongan iti Dios ken kadagiti sientista ti napartak a pannakatakuat ti Covid 19 vaccines ta daytoy ti mangisubli iti natalged a kasasaad ti salun-at dagiti tattao iti nagduduma a pagilian. Sadiay United States of America, United Kingdom ken dadduma pay a naprogreso a pagilian ket narugianen itay pay Disiembre ti “emergency use” ti bakuna. Idiay US, nagpabakunan ni President-Elect Joe Biden ken dadduma pay a nangato nga opisial ti gobiernoda kas panangipakitada ti panagtalekna iti bakuna nga aramid ti pagilianda. Nagbalin ngamin ti Estados Unidos a kaaduan dagiti naapektaran iti Covid 19.

Adu dagiti mangnamnama a kadagiti umun-una a bulan iti 2021 ket addanton legal a maiparuar a bakuna kontra Covid 19 iti Pilipinas ken marugianton ti mass vaccination dagiti adu nga umili iti laksid dagiti timmaud a kontrobersia sakbay ti panaggibus ti 2020 kas ti natungday a pannakagatang ti bakuna a produkto ti Pfizer iti Estados Unidos, ken naikurimed a pannakabakuna dagiti dadduma a kameng ti Presidential Security Gruop a mangsalsaluad ti seguridad ni Presidente Rodrigo Duterte ken ti pamiliana.

Nagbalin a kontrobersia ti pannakabakuna dagiti dadduma a miembro ti PSG ta awan pay ti legal a Covid 19 vaccine nga inaprobaran ti Foods and Drugs Administration, ket possible a sumango ti kaso dagiti nangiwayat ti illegal a panagiserrek iti medisina ken panagbakuna.

Kalaksidan kadagiti dadduma a kameng ti PSG, addan dagiti naipadamag a nabakunaan iti kontra Covid 19 kas kadagiti sumagmamano a kameng ti Armed Forces of the Philippines, Philippine National Police, Gabinete ken Kongreso. Awan pay ti naipadamag manipud iti health services iti Pilipinas. Nasken nga isuda koma ti maikkan iti prioridad iti bakuna nangruna kadagiti frontliners. Dayta a pasamak ket iyanninawna ti wagas ti gobierno iti pannakamanehar ti salun-at dagiti Pilipino no sino dagiti maipaayan iti prioridad ta addan dagiti nausar ken naiserrek a bakuna iti Pilipinas babaen ti black market. Ti kangrunaan a pakapilawan ket dagiti pay asideg iti Presidente dagiti immuna a nagdalan iti illegal a panagbakuna, imbes nga isuda ti pagwadan iti panangsurot kadagiti linteg ken pagallagadan.

 Saan pay laeng a masinunuo ti masalbayan dagiti Pilipino iti panangsango iti Covid 19 agingga nga awan ti natalged ken nasamay a bakuna a maipaay kadagiti amin a mayat nga umili. Dakkel a pondo ti kasapulan iti pananglaban ti pandemia nangruna iti panagbakuna kadagiti napanglaw.

Inaprobaranen ni Presidente Duterte ti P4.5 Trillion National Budget para ita a tawen, ket manamnama a naikkan ti importansia ken prioridad ti pannakasaluad ti salun-at dagiti umili ta no saan a maparmek ti Covid 19 babaen ti bakuna ket agtultuloyto latta dagiti community quarantine iti nagduduma a paset ti Pilipinas a mangtengngel iti garaw dagiti umili ket agsagaba ti ekonomia ti pagilian. Sapay koma ta dagita a pondo ket maaramatda a nasayaat, saan ketdi nga ibulsanto manen dagiti kurap nga agpapaay iti gobierno.

Napalabasen ti 2020 a nangsubok ti kinatibker dagiti Pilipino iti sango dagiti adu a tuok ken rigat nga insangbay ti Covid 19 ken dagiti nagsasaruno a kalamidad. Ita adda manen baro a klase wenno strain ti Covid 19 manipud UK ken Sabah, Malaysia. Sapay koma ta mapaksiat daytoy ken saanen a makadanon iti Pilipinas.

Adu dagiti nadagsen a problema iti agdama a tawen a pinataud ti Covid 19 ken dagiti nagsasaruno a kalamidad, ngem napaneknekanen ti kinaandur dagiti Pilipino nga uray no madalebda ket makabangondanto manen. Napaneknekanen nga iti laksid dagiti panagririri ken saan a panagkikinnaawatan dagiti Pilipino ket no tempo ti rigat, tumpuar latta ti panagtitinnulong ken panagsisinnaranay. Iti panawen ti nalabes a tuok ken rigat, sitatalek nga agtaklinda iti Dios a tumulong kadakuada iti awitda a krus ken umlaut-ot ti nakailumlumanda a rigat. Iti umuna a lawas ti 2021, nasken a rugian dagiti Pilipino ti Baro a Tawen a napnuan iti namnama a danggayan ti panagtalekda iti Dios, panagkaykaysa ken napasnek a panagtrabaho tapno magun-od dagiti tarigagay para ti sapasap a pagsayaatan ti Pilipinas.

Exit mobile version