BANNER NEWS. Baro a wagas a pangpaksiat iti dengue, nairusat

CANDON CITY – Manamnama ti pannakapugipog ti sakit a dengue ditoy probinsia babaen ti maysa a baro a wagas a pangpaksiat iti lamok nga agiwaras iti dengue virus.

Impakaammo ni Benjamin Castillo ti Department of Health-Ilocos Sur a naisayangkat idi Hunio 9 ditoy siudad ti orientasion mainaig ti panagaramat iti Ovi/Larvicidal Trap wenno O/L Trap, maysa nga organic trap system a pangkontrol ken panglapped iti panagadu ti Aedes Aegypti, ti lamok nga agiwaras iti dengue virus babaen ti initiatibo ti Department of Health (DoH) ken ti Department of Science and Technology (DoST) .

Kinuna ni Castillo a napili ti Cabugao, Sinait ken Candon City a makipartisipar iti nasao nga  orientasion agsipud ta dagitoy nga ili ken siudad ti kaaduan ti nagsakit iti dengue kadagiti napalabas a tawen.

Ditoy siudad, kangrunaan a barangay a nakipartisipar iti orientasion ti Calaoa-an, San Jose ken Tablac.

Babaen ti initiatibo ti DOST ken iti pannakitinnulong ti Philippine Council for Health Research and Development (DOST-PCHRD), pinartuat ti Industrial Technology Development Institute (DOST-ITDI) ti Ovi/Larvidical (OL) Trap System, maysa a simple a teknolohia a pangkontrol iti babai nga Aedes a lamok babaen ti panagaramat iti natural a kemika (larvicide) a mangpatay kadagiti itlog ken kitikiti ti Aedes a lamok nga agiyak-akar iti dengue virus.

Sakbay ti orientasion ti OL Trap ditoy siudad, nairusaten daytoy kadagiti 28 a lugar  a pakaibilangan ti Albay, Camarines Norte, Camarines Sur, Catanduanes, Masbate, Sorsogon, Legazpi, Davao City, Bicol, Leyte ken uray iti Pangasinan ken dadduma pay a lugar iti pagilian a nagrairaan ti dengue.

Kasta met nga inyalokar ti DOST ti 2,800 kits para kadagiti 17 a rehion iti pagilian a pakairamanan ti Autonomous Region in Muslim Mindanao (ARMM) malaksid ti National Capital Region a maikkan iti 5,200 kits.

Maited dagiti kits kadagiti mapili a bumalay a makipartisipar iti nasao a gannuat a panangrupak iti panagraira ti dengue.

Simple laeng a systema ti O/L Traps: ilaok ti organic pellets wenno tablets iti 250 ml a danum a naikabil iti uneg ti maysa a nangisit a lata sa ikabil daytoy iti nalinong a paset iti paraangan. Kalpasan ti 6-7 nga aldaw, karusen ti lawanit a  nagitlogan dagiti lamok iti danum a nakailaokan dagiti organic pellets a mangpatay kadagiti kitikiti ken tapno saanen a pagbiagan pay dagiti agbalin a lamok nga agiwaras idi dengue virus.#