Footer

Baro a wage order, rummuar iti mabiit: DOLE

VIGAN CITY- Kinuna ti Department of Labor and Employment (DOLE)  a rummuar iti mabiit ti desisionda mainaig iti posible a pannakaingato ti sueldo dagiti mangmangged iti Rehion Uno.

Segun ken ni DOLE Regional Director John Henry Jalbuena (agpapaay pay a chairman ti Wage Board), narigat ti mangipaay iti aniaman a desision ta masapul a maikonsidera dagiti mabalin nga epekto daytoy iti kasasaad ti ekonomia ditoy a rehion.

Innayonna a malaksid kadagiti kasapulan dagiti mangmangged, masapul nga ikkan iti naan-anay nga importansia ti kabaelan nga agbayad dagiti employers, ti relasion ti sueldo ken kita kasta metten ti kasapulan iti economic development.

Naangay ti public hearing itay nabiit ditoy a siudad a nagsasanguan dagiti grupo ti employers, dagiti mangmangged, ken ti Regional Tripartite and Wage Productivity Board  mainaig iti posible a pannakairuar ti baro a wage order a mangituyang iti nangatngato a minimum wage iti Rehion Uno.

Iti agdama, P170 ti minimum a sueldo dagiti mangmangged kadagiti babassit nga establisimiento idinto nga umabot iti P225 kadagiti dadakkel a kompania.

Aminado ni Jalbuena a saanda a maipaay amin a kiddaw ti employees sector ta amangan no mangitunda daytoy iti panagpangato ti unemployment rate wenno panagrikep ti sumagmamano nga establisimiento ditoy.

“Rumbeng a mabalanse a nasayaat ti amin. Ti laeng maipasiguradok, agbalin nga objective iti agsumbangir a panig ti desision ti board,” kinuna pay ni Jalbuena.

Kalpasan ti pannakaisayangkat dagiti public hearing kadagiti uppat a probinsia iti rehion, adda 45 nga aldaw a pawayway ti board tapno makairuar iti pinal a decision.

Kinuna ti regional director  nga addanto latta dagiti kaso ti non-compliance dagiti kompania aglalo  iti umuna a tallo a bulan ti implementasion ngem impasiguradona nga agtultuloy ti routine inspection ti DOLE tapno makita ti naannayas a pannakaiyimplimentar ti pammilin.

Pinalagipan pay ni Jalbuena dagiti employers nga umadanin ti Paskua ket masapul a maited ti 13th month pay dagiti taoda kas naisaad iti Labor Code.#