Baro, binagsol ti kalugaranna

VIGAN CITY – Saan a panagkinnaawatan bayat ti panagginomda iti nasanger ti nangrugian ti panagdinnisnog dagitoy agkalugaran sadiay Barangay Salindeg ditoy siudad idi rabii ti Pebrero 11 a nagtunged iti pammagsol.

Naitaray ni Cristobal Alquiza y Camarillo, 28, baro, iti Gabriela Silang General Hospital idinto a naglibas ti nangbagsol kenkuana a ni Henry Alquiza y Aquisay, 46.

Sakbayna, nagginom ti biktima ken suspek iti balay ti naud-udi idi nagririda a nagtungpal iti panagdinnisnogda.

Kalpasan a naanawada, pimmanaw ti biktima ket dimmagas iti natayan iti met la barangayda ngem simmaruno gayam ti suspek ket napasamak manen ti panagdinnanogda.

Mapapati a binunot ti suspek ti patademna sana binagsol ti biktima a nagsagrapan daytoy iti sugat iti baba ti makannawan a paragpagna.

Naglibas ti suspek a nagturong iti abagatan a direksion ket sinapul dagiti polis ngem dida nabirokan.#