Baro, binagsol ti ulitegna

STO. DOMINGO, Ilocos Sur – Napan naganawa ngem idi agangay nakiriri metten a puon ti pannakabagsolna.

Iti report manipud ti polis ditoy, aksidente a nabagsol ni Norman Tadios y Tabil, 32, naasawaan, ti kaanakanna a ni Rafael Tadios y Tabil, 20, agpada a residente iti Barangay Nambaran East, ditoy nga ili bayat ti panagririda idi rabii ti Disiembre 11.

Sakbay ti pammagsol, nagriri da Norman ken ti kabsatna a ni Dinalyn mainaig iti motorsiklo ti amada ket napan naganawa ni Rafael.

Ngem binallaagan ni Norman ni Rafael a saan a bumiang a nagtungpal iti panagsubangda a dua.

Mapapati a nangpidut ni Rafael iti imuko ket naginnagawda nga aguliteg a puon ti aksidente a nakabagsolan ti makannigid a paset ti tian ni Rafael.

Immuna a naitaray ni Rafael iti kaasitgan nga ospital sa naiyalis iti Gabriela Silang General Hospital.

Inaresto dagiti nagresponde a polis ti suspek idinto a narekobreda ti imuko nga agatiddog iti 12 pulgada agraman ti pagiggamanna.#