Baro, binagsol, tinagbat ti kalugaranna

MAGSINGAL, Ilocos Sur -Saanen a naiyabot pay ti biag ti maysa a baro iti ospital kalpasan a binagsol ti kalugaranna iti Barangay San Lucas, ditoy nga ili idi parbangon ti Enero 1.

Dead on arrival iti Magsingal District Hospital ni Jobelle Tamayo y Tollo, 26, baro, awanan panggedan, gapu iti pannakabagsolna iti makannawan a barukongna ken pannakatagbat ti tengnged ken rupana.

Nainaganan ti suspek a ni Bonifacio Soliven y Tamayo, 33, naasawaan, laborer, kalugaran met laeng ti biktima.

Segun iti inbestigasion, nakarurod ti suspek a mapapati a nakainom gapu iti panangpabanurbor ti biktima iti motorsiklona ket nangala iti bolo manipud iti balayda sana binagsol ken tinagbat ti biktma.

Boluntario a simmuko ti suspek kadagiti nagresponde a polis ket naipaagas ti dunorna iti takiagna iti Tolentino Clinic and Hospital.

Naipila ti kaso a murder maikontra ken ni Soliven iti provincial prosecutor’s office iti Vigan City.#