Baro, di natuloy a nakasuan iti anti-carnapping

CANDON CITY – Nakalusot daytoy a suspek iti kaso a panag-carnap gapu ta saanen nga interesado ti akinkukua iti motorsiklo nga intalawna nga agdarum pay.

Natiliw ni Virgilio Baroma y Quitalen, 29, baro, ken residente iti Barangay Poblacion Sur, Sta. Cruz, Ilocos Sur bayat ti panangitalawna iti maysa a motorsiklo idi agarup pasado alas dies ti rabii ti Mayo 4.

Nagresponde dagiti polis idi nakaawatda iti tawag iti telepono manipud iti guardia ti De Javu KTV Bar nga adda nakitana a lalaki a mapagduaduaan dagiti tignayna.

Iti panagsawar dagiti polis, nakitada ni Baroma a nakasakayen iti motorsiklo ngem idi nakita ida ti suspek, nagpakannawan a nagpakaskas nga agturong iti Barangay Paras.

Naipiskot dagiti polis ti suspek ket  nakasamsamanda pay iti kitchen knife iti ikut ti suspek.

Ngem nagpirma ti akinkukua iti motorsiklo iti affidavit of desistance a saanen nga interesado nga agipila iti kaso maikontra ken ni Baroma.#