Baro, ginudas armado a lallaki a riding in tandem

VIGAN CITY – Dua laeng nga aldaw ti napalabas kalpasan ti pannakapaltog ti maysa a tricycle driver, sabali manen a pammaltog ti napasamak idi rabii ti Abril 25 a nagresulta iti pannakatay ti biktima.

Pinaltogan dagiti armado a lallaki a nagkalubbon iti motorsiklo ni Mark Anthony Aludino Rapirap, 29, ken residente iti Barangay III, ditoy siudad iti sanguanan ti Simbaan a bassit a masarakan iti Liberation Boulevard, Barangay VIII.

Segun iti polis, agtugtugaw iti lauden a paset ti simbaan da Aludino, ti kayongna a ni Arnel Caparra Lazarte, 34, tricycle driver, ken residente iti Barangay Ayusan Norte, Vigan City; ken maysa a di nainaganan a kaduada idi ti immasideg ti maysa a lalaki a nagaruat iti camouflage, long pants, nakakallugong iti nangisit a bonete sana pinaltogan iti sumagmamano a daras ti biktima.

Kalpasanna, naglugan ti di nabigbig a suspek iti agur-uray a motorsiklo ket pinakaskas ti nakabonete met a kaduana ti lugan a nagturong iti daya a direksion.

Intaray dagiti nagresponde a polis ni Aludino iti Metro Vigan Cooperative Hospital, Bantay, Ilocos Sur ngem indeklara ti attending physician a dead on arrival.

Nangiwayat dagiti polis iti pursuit operation ngem nakalibasen dagiti nangisayangkat iti krimen.

Iti panagimbestiga dagiti duty investigators ken KIMAT (Keen Investigators Monitoring and Action Team), nakasarakda iti crime scene iti lima a kapsula manipud iti cal. 45.

Daytoy ti maikadua a pammaltog a napasamak ditoy siudad iti las-ud ti dua nga aldaw.

Idi malem ti Abril 23, napaltogan ni Joseph Arizabal y Alonzo, 48, naasawaan, ken residente iti Zone 6, Bantay, Ilocos Sur, bayat nga agdaldaliasat ti traysikelna iti Rizal Street, Barangay IV, amiananen laeng ti Iglesia ni Cristo, babaen dagiti di nabigbig a suspek a naglugan iti motorsiklo.

Pimmusay ni Arizabal bayat ti pannakatamingna iti Metro Vigan Cooperative Hospital a nakaitarayanna.

Mapapati a cal. 45 ti paltog a naaramat iti krimen kas maibatay iti dua a kapsula a nasarakan dagiti inbestigador iti crime scene.

Kitkitaen dagiti polis no adda panagkanaig dagiti dua a pammaltog.#