Footer

Baro, inarmalait ti agkabsat

SAN ESTEBAN, Ilocos Sur – Maysa a baro ti pinaltogan ti agkabsat babaen ti baby armalite ken cal. 45 a nakaigapuan ti pannakatayna idiay barangay San Pablo ditoy nga ili.

Nagudas nga insigida ni  Franvelle Clores y Ebojo, 25, baro ken residente ti Barangay San Pablo kalpasan ti panangarmalait kenkuana da Justine Ebojo, 18, baro, ken ti kabsatna a ni Abraham Ebojo alias Abe, babaen iti panakitinnulong da Armando Esquivel ken Atong Sigua, agpapada a residente iti nasao met laeng a barangay.

Iti panagimbestiga dagiti polis, naammuan  a maysa nga Starex van a nagluganan dagiti masuspetsa ti nagsardeng iti sanguanan ti pagtaengan ni Bobbit Ferrer, kaarruba ti biktima.

Kalpasan ti maysa nga oras, dimsaag dagiti suspek ket napanda iti balay ti biktima nga adda laeng iti bangir ti national highway ket binirokda ni Francisco, ama ti biktima. Ni Violeta, ina ti biktima, ti nakisarita kadagiti suspetsa agsipud ta awan ni Francisco.

Bayat nga agpapatangda, simmangpet ti biktima a nakalugan iti motorsiklo, imparkna ti lugan sa immasideg.

Ngem inruar ni Justin ti baby armalait sana pinaltogan ti biktima a nakapuntaan ti ulona. Pinasarunuan ni Abe a pinaltogan ti biktima babaen ti kalibre 45.

Nagtaray ni Jovife, kabsat ti biktima, idi makitana  a napasag ti kabsatna ket pinaltogan dagiti suspek ngem dida napuntaan.

Naglugan dagiti suspetsa iti van sada naglibas a kuyogda dagiti armasda.

Naala dagiti inbestigador iti nakapasamakan ti krimen ti tallo a kapsula ti M16 ken maysa a kapsula ti kalibre .45.

Dati a susik ti mapapati a motibo ti pammapatay.#