Baro, kinagat ti uleg bayat panagalana iti rabong

SAN ESTEBAN, Ilocos Sur –  Natay ti maysa a baro gapu iti pannakakagatna iti uleg bayat ti panagalana iti rabong iti kabakiran a paset ti barangay Cabaroan, ditoy nga ili idi Hunio 16.

Segun iti report manipud iti polis ditoy, naideklara nga awanen ti biag ni Marvin Tamayo, 22, ken residente iti nasao met laeng a barangay idi maidanon iti ospital.

Kinuna ni Camilo Tamayo, uliteg ti biktima, nagturong ti biktima iti kabakiran  tapno agala ti sidaenda a rabong, ngem agtartaray ti biktima a nagsubli sana imbaga a tinukkawan ti karasaen.

Impan da Camilo ni Marvin iti maysa a mannandok sadiay Santiago, Ilocos Sur ngem uray idi natandoken ti biktima,  napaliiwda a nabessag unayen ken agngadalen nga agsao isu nga intarayda iti ospital ngem indeklara ti doktor a nangtaming iti biktima nga awanen ti biag daytoy.#