Baro, naaresto gapu panagikutna nadumaduma nga armas

CAOAYAN, Ilocos Sur – Panangipagarup daytoy a baro ket kapadana ni Rambo, nalatak a karakter iti pelikula nga aksion, isu nga armado iti nadumaduma nga armas.

Ngem malasna ta inaresto dagiti polis ditoy nga ili ket kas resulta, napilaan iti panaglabsing iti RA 10591 ken Batas Pambansa Bilang 6.

Naaresto ni Sherwin Advincula y Quidolit, 26, baro, ken residente iti Barangay P. Tamurong, Caoayan, Ilocos Sur idi malem ti Septiembre 7 gapu iti panagikutna kadagiti nadumaduma a klase ti armas a pakaibilangan ti maysa a bolo nga agatiddog iti sumurok-kumurang 15 pulgada; cal. 38 revolver a nagkarga iti 5 a bala ken maysa a kapsula; improvised ice pick nga agatiddog iti 5 pulgada; kutsilio nga agatiddog iti 6 pulgada; ken lima pay a bala para iti cal. 38.

Iti pannakaisurat daytoy, naiyendorson ti kaso ni Advincula iti Opisina ti Provincial Prosecutor, Vigan City babaen ti inquest proceeding.#