Baro, nabagsol bayat panangselebrarda iti Paskua

VIGAN CITY – Nagtungpal a riri ti panangselebrar dagitoy agkakadua iti Paskua a nakabagsolan ti maysa.

Segun iti report, nabagsol ni Lawrence Raras Pagaoa, 23, baro, ken residente iti Barangay IV, Vigan City ket ti kinainomna a ni Wilfred Aberin Montano, 20, baro, ti nangbagsol kenkuana.

Iti inisial a panagimbestiga dagiti polis, naggiinom da Raras, Aberin, ken Jomar Parto Tacud, 20, iti balay ti naud-udi sadiay Barangay VI, Vigan City kas panangselebrarda iti Paskua.

Nagpaut ti drinking session kalpasan ti tengnga ti rabii sada napan nagpasiar iti Plaza Burgos, Barangay 1.

Nagsubli dagiti agkakadua a naggiinom iti balay ni Tacud idi agarup 1:00 ti parbangon.
Mapapati a bayat ti panaggiinomda, adda nabara a nagsinnupiatan da Raras ken Aberin ket nagdinnisnogda.

Binagsol ni Aberin ni Raras iti namindua a nagsagrapanna iti sugat iti likud.

Mapapati a tinulongan ni Tacud ni Aberin babaen ti panangdisnogna ken ni Raras.

Naitaray ni Raras iti Gabriela Silang General Hospital idinto nga inaresto dagiti polis dagiti suspek iti balay ni Tacud.

Narekobre dagiti polis ti Batangas knife nga inusar ni Aberin a pinangbagsol ken ni Raras.

Naikustodia dagiti suspek iti police station ditoy.#