Baro, nabagsol gapu iti angaw

VIGAN CITY – Gapu iti panangilemmengda iti sinelasna, nakiriri ti suspek ken binagsolna ti suspetsana a nangangaw kenkuana.

Binagsol ni Joel Raboy y Racca, 31, baro, ken residente iti Barangay Rugsuanan ditoy siudad ti kinainomna a ni Louie Mar Castillo y Agliam, 23, baro, ken kalugaranna idi agarup alas 8:00 ti rabii ti Hunio 2 bayat ti pannakiririna kenkuana kalpasan a sinuspetsana daytoy a nangilemmeng iti sinelasna.

Segun iti report, naggiinom da Raboy, Castillo, ken dagiti gagayyemda a da Conrado Mendoza ken Ferdinand Figuerrez iti balay ti inaudi  ngem idi aggawiden ti suspek, dina mabirokan ti sinelasna ket sinuspetsana ni Castillo a nangilemmeng a nagresulta iti panagringgor ken panagboksingda a dua.

Ginammatan ti suspek ti botelia ti kuatro kantos sana binuong ket daytoy ti imbagsolna iti biktima.

Naitaray ni Castillo iti Gabriela Silang General Hospital para iti pannakaagasna idinto nga inaresto dagiti nagresponde a polis ni Raboy.#