Baro, nabagsol iti rambol

TAGUDIN, Ilocos Sur – Maysa a baro ti nabagsol iti rambol iti ruar ti maysa a videoke bar iti Bitalag ditoy.

Naitaray  iti Tagudin District Hospital sa naiyalis iti San Fernando City gapu iti pannakabagsolna ni Celso Antonio, 29, baro, agnaed iti Santol, La Union.

Nainaganan laeng a Noel ken Rommel dagiti mapapati a nangbagsol kenkuana.

Segun iti report, napan naginom ti biktima ken kakaduana a Ricky Antolin, Cenon Antonio, Sito Antonio ken Valentin Bal-a iti Kambingan Videoke Bar iti Barangay Bitalag ditoy nga ili ket adda nakariri ti biktima iti grupo ti suspetsa nga agiinom met iti nasao a videoke bar.

Rimmuar ti biktima ngem sinaruno dagiti suspetsa a nagtungpal iti panagrarambolda.

Maysa kadagiti suspetsa ti mapapati a nangbagsol iti biktima ken nangbarsak iti rupa daytoy.

Naglibas dagiti suspetsa kalpasan ti pammagsol.#