Baro, nadisnog gapu iti ‘panagayatna kadagiti tattao’

SUGPON, Ilocos Sur – Gapu iti panangipeksana iti “panagayatna kadagiti tattao”, nadisnog ti maysa a baro idi rabii ti Enero 3 sadiay Sitio Toyeng, Barangay Banga, ditoy nga ili.

Naammuan manipud iti report ti Sugpon Police Station a dinisnog ni Ronie Sagayo y Tandagen, 20, baro, ti kalugaranna a ni Solomon Regados y Bulled, 22, baro, gapu ta nakarurod iti daytoy nga imbalikas ti kalugaranna bayat ti panagiinomda iti dayta a rabii.

Segun iti inbestigasion dagiti polis, nabarteken dagiti dua a nagginom iti maysa a sari-sari store idi inwaragawag ni Regados iti sanguanan dagiti barangay tanod a no imbalikasnan ti “I love you people!”, pammaneknek daytan a nabartek.

Mapapati a nairita ni Sagayo iti dayta a balikas ni Regados ket dinisnogna ti kalugaranna a nakatiruan ti makannigid a matana.
Naitaray nga immuna ni Regados iti municipal health center sa naiyalis iti Tagudin General Hospital.

Impaima met dagiti tanod ti suspek kadagiti nagresponde a polis.

Kabayatanna, nadisnog met ti maysa a mannalon gapu iti panagpaputokna babaen ti lata a kanion kas tuloy a selebrasion ti baro a tawen.

Idi agarup 9:05 ti rabii ti Enero 3, nagpulong iti polis ni Rocky Molina y Laurente, 35, naasawaan, mannalon, ken residente iti Barangay Labut Norte, Santa, Ilocos Sur, a dinisnog ni Wilfredo Bringas y Advincula, kalugaranna, gapu iti panagpaputokna babaen iti lata a kanion.

Kuna ti polis a nakapungtot ni Bringas gapu ta iti panagpappaputok da Molina, nabuak ti maysa kadagiti bakana ket timmaray sa nakisangdo iti sabali a baka.

Mapapati nga idi naggawid ni Molina, kinompronta ni Bringas sana dinisnog ti makannigid a mata ti biktima.#