Baro, nagbekkel iti Aldaw dagiti Puso

SINAIT, Ilocos Sur – Pinili pay met daytoy a baro a kinettel ti biagna iti Aldaw dagiti Puso.

Nagbekkel ni Melchor Ibera y Yabes, 29, baro, construction worker, ken residente iti Barangay Cabangtalan, ditoy nga ili, ket nupay intaray dagiti kabagianna iti Corpuz Clinic and Hospital, naideklara nga awanen ti biagna.

Sakbayna, simmangpet idi agarup 10:00 ti rabii iti nadakamat a petsa ni Ibera a nakainom ket intuloyna ti nagbartek sana pinadas a kettelen ti biagna ngem nalapdan ti kalib-inna a ni Mena Joy Villa Flores y Royo, 27.

Rimmuar ni Villa Flores sana impakaammo ti insidente iti ina ni Ibera babaen ti selpon.

Idi agsubli ni Villa Flores, nasukalanna laengen nga imbitin ni Ibera ti bagina iti uneg ti kalapawda babaen ti tali a naipulipol iti tengngedna.

Nakuna ni Villa Flores a ginandaten ni Ibera a kettelen ti biagna sipud pay idi natay ti umuna nga anakda a lalaki idi Oktubre 2012.#