Baro, nagbekkel sakbay ti panagtapos ti tawen

VIGAN CITY – Nakaro siguro ti problema daytoy a baro ta kinettelna ti biagna, maysa nga aldaw sakbay ti isasangbay ti baro a tawen.

Naduktalan laengen ni Hally Galace y Caasi, 65, balo, ina ni Jose Tereso Galace y Caasi, 32, baro, ken residente iti Barangay IV, ditoy siudad, a nakabitin ti anakna iti uneg ti siled daytoy idi agarup alas 6:30 ti bigat ti Disiembre 31.

Nagaramat ti biktima iti GI tie wire knot iti panagbekkelna.

Nagpaarayat ni Hally iti kabsat ti biktima a ni Kervy ngem idi amirisen ni Dr. Carmelo papa, mediko-legal ti Vigan City health Office, indeklarana a dead on the spot daytoy.

Saan a nailanad iti police blotter no ania ti nakagapu iti panagbekkel ni Galace.#