NARVACAN, Ilocos Sur – Nagpakada pay daytoy a baro kadagiti kinainomna sana kinettel ti biagna.
Nagpakamatay ni Roderick Ambaquil y Aguisan, 23, baro, residente iti Barangay Sarmingan ditoy nga ili babaen ti paltog idi rabii ti Enero 17.
Segun iti inisial nga inbestigasion dagiti polis, sakbay ti insidente, naggiinom da Ambaquil ken sumagmamano a kabagianna iti maysa a pakarso iti asideg ti karayan ti nadakamat a barangay.
Mapapati a nagpakada ti biktima tapno mapan umisbo ngem di mabayag, nakangeg dagiti kainomna iti kanalbuong ket idi napanda kitaen ti biktima, nakadalutaytayen a daradara.
Nakarekobre dagiti polis iti cal 45 pistol nga awanan iti serial number ken maysa a kapsula iti uneg ti chamber ti paltog ken magasin nga awan naggianna a bala.
Mapapati a simrek ti bala iti makannawan a pispis ti biktima sa limsut iti akinngato a paset ti mugingna.#