Baro a nagitukon iti tinnakawan a motorsiklo, naipiskot dagiti otoridad

CANDON CITY – Narekobre dagiti polis ti maysa a natakaw a motorsiklo kalpasan a nagsuspetsa ti nangitukonan ti suspek Barangay Patpata 1st, ditoy siudad idi agsapa ti Oktubre 16.

Natiliw ti suspek a ni Teodorico Alcantara y Pre, 31, baro, helper iti furniture shop, ken residente iti Barangay Nagsangalan, Vigan City kalpasan nga impulong ni Marlon Galanto, residente iti Barangay Patpata 1st iti maysa a barangay tanod mainaig iti ituktukonna a motorsiklo iti nalaka a kantidad.

Sakbayna, idi Oktubre 9, naireport iti polis a natakaw ti motorsiklo, maysa a Honda Wave 100, sadiay Barangay San Pablo, Narvacan a nairehistro iti nagan ni Benjamin dela Cruz y Moises.

Makalawas kalpasanna, idi agarup 7:00 ti bigat ti Oktubre 16, inasitgan ni Alcantara ni Galanto ket intukonna nga ilako ti motorsiklo ket dimmawat iti P3,000.00 kas pakpakauna a bayadna.

Inted ni Galanto ti kuarta kalpasan nga inkari ni Alcantara nga agsubli met laeng a kuyogna ti resibo ken dokumento ti panagtagikua iti nasao a motorsiklo.

Nagsubli ti suspek ngem dimmawat manen iti P1,000.00 a nagsuspetsaan ni Galanto ket nagpatulong ken ni Chief Tanod Laurence Valdez.

Nagtaray ti suspek a nagpadaya sa naglinged iti maysa a piskeria ngem natiliw da Kagawad Camilo Galanto ken dagiti kakaduana ket impaimada kadagiti nagresponde a polis.

Iti pannakaisurat daytoy, adda ti suspek, agraman ti narekobre a motorsiklo iti kustodia ti Candon City police station para iti umisu a dokumentasion ken disposision.#