Baro, nakainom, binatona, balay, 2 lugan

MAGSINGAL, Ilocos Sur – Gapu iti pannakabartekna, inubor ti maysa a baro ti maysa balay ken dua a lugan sadiay Barangay Barbarit idi aldaw ti Hunio 29.

Segun iti report manipud iti polis ditoy, binato iti botelia ni Andres Garcia y Duldulao, 35, mapapati a nakainom ken addaan iti diperensia ti ulo, ti balay ni Evelyn Armas y Valdez, 40, naasawaan, ken residente met laeng iti nadakamat a barangay.

Bayat ti panagimbestiga dagiti polis, nagpulong kadakuada ni Robert Bautista y Peralta, 34, baro, ken residente iti Barangay 17, San Asuncion, San Nicolas, Ilocos Norte a binato ni Garcia ti Isuzu Elf delivery aluminum van a lugan bayat ti panagdaliasatna iti highway a sakup ti nadakamat a barangay.

Nagsagrap iti dadael ti makinngato a paset ti van.

Nagpulong pay iti polis ni Romeo Divina y Catriz, 43, naasawaan, ken residente iti Barangay 1, San Nicolas, Ilocos Norte, binato met ti suspek ti luganna a Mitsubishi Strada a nakagaradgadan ti makinsango a bumper.

Kalpasan a naipakatan ni Garcia iti medical and physical examination, naipan iti police station para iti umisu a disposision.#