Footer

Baro, nakasuan gapu’t panagbinnagsolda kinaririna a lakay

VIGAN CITY – Gapu iti panagbinnagsolda iti kinaririna a lakay, naiyendorso a makasuan ti maysa a baro iti City prosecutor’s office ditoy siudad idi Disiembre 10.

Nakasuan iti frustrated homicide ni Rodel Antiporda y Cruz, 38, ken residente iti Barangay 1, Vigan City gapu iti panagbinnagsolda ken ni Regolo Antino y Racho, 75, naasawaan, ken residente iti Barangay 8, Vigan City.

Maipalagip nga idi agarup 10:18 ti rabii ti Disiembre 9, mapapati a nagriri dagiti dua a nagtungpal iti panagbinnagsolda.

Segun iti inisial a panagimbestiga dagiti polis, kalkalpas a naggiinom da Antino ken Antiporda iti compound ti Pacific Auto Supply idi naparnuay ti saanda a panagkinnaawatan bayat ti kaaddada sadiay Mabini Street, Barangay 1, Vigan City a nagresulta iti panagboksingda ken panagbinnagsolda.

Ngem mapapati a maysa a lalaki a kabagian ni Antiporda ti timmulong a nangatake ken ni Antino a nakagapu iti pannakasagrapna iti dunor iti muging ken ulona ken bagsol iti nadumaduma a paset ti bagina.

Nagsagrap met ni Antiporda iti bagsol iti barukongna.

Agpada dagiti dua a naitaray iti Gabriela Silang General Hospital para iti pannakaagas dagiti sugatda.
Narekobre iti crime scene ti maysa a daradara a bato a mapapati nga inaramat ni Antiporda ken daradara met a Batangas knife nga agatiddog iti siam a pulgada pakairamanan ti pagiggaman a mapapati a naala ti naka-duty a security guard ti Gabriela Silang General Hospital iti ikut ni Antino.

Iti pannakaisurat daytoy, di pay ammo no sino ti kabagian ni Antiporda a timmulong kenkuana.

Madama ti panagimbestiga dagiti polis mainaig iti nasao a riri.#