Baro, nakumpiskaan iti droga

STA. CRUZ, Ilocos Sur – Nakumpiskaan iti maiparparit a droga ti maysa a baro babaen ti insayangkat dagiti polis nga operasion sadiay Barangay Villa Hermosa ditoy nga ili itay nabiit.

Inaresto ti nagtipon nga elemento ti Sta. Cruz police station ken PDEA INIS ni Jaypee Lavaro y Galinta, 30, babaen ti inwayatda a buy-bust operation iti nadakamat a barangay idi agarup 5:30 ti malem ti Enero 13.

Nakakumpiska dagiti polis iti ikut ni Lavaro iti dua a sachet a naglaon iti mapapati a nagango a bulong ti marihuana, dakkel a sachet a naglaon iti mapapati a shabu ken nalukot a foil, dua a sag-P1,000.00, maysa a P20.00, cellular phone, ken pakete ti sigarilio.

Maisagsagana ti kaso a panaglabsing iti RA 9165 maikontra ken ni Lavaro.#