NARVACAN, Ilocos Sur – Nalmes ti maysa a baro bayat ti panaglangoyna iti kabaybayan iti asideg ti maysa a beach resort ditoy nga ili idi malem ti Mayo 19.
Nabigbig ti biktima a ni Jonathan Caban y Panem, 26, baro, empleado ti gobierno, ken residente iti Barangay Poblacion West, Pidigan, Abra.
Segun iti report, nagturong ti biktima ken padana nga empleado iti Monte Leah Beach Resort tapno agdidigosda idi agarup 4:10 ti malem iti nadakamat nga aldaw.
Mapapati nga immadayo ti biktima kadagiti kakaduana iti panaglangoyna iti kabaybayan.
Nangeg laengen dagiti dadduma a sangaili ti nasao a resort ti biktima nga agpapaarayat.
Inalaw dagiti kakaduana ti biktima sada intaray iti Central Ilocos Sur District Hospital ngem naideklara nga awanen ti biagna.
Sinertipikaran ti doktor a nangtaming kenkuana nga adda daytoy iti inpluensia ti arak.#