BANAYOYO, Ilocos Sur – Nagramut daytoy a pammaltog iti panagbiddut ti biktima iti intalmegna a kumbinasion ti numero ti kanta iti videoke bayat ti maysa a drinking spree sadiay Barangay Poblacion ditoy nga ili idi rabii ti Nobiembre 18.
Segun iti report, bayat ti panaggiinumda, imbaga ni Carlos Garnace y Baliwag, 23, baro, ti number combination nga italmeg ni Miguel Garcian III y Malag, 25, baro, iti videoke machine ngem sabali a numero ti naitalmeg ti biktima.
Gapu iti daytoy, mapapati a nakarurod ni Garnace ket inasutna ti sabbikelna a paltog sana pinaputokan ni Salingbay a nakapuntaan iti makannigid a pingping daytoy.
Naitaray ti biktima iti Candon General Hospital sa naiyalis iti St. Martin de Porres Hospital para iti pannakaagasna idinto a boluntario a simmuko iti polis ti suspek a kinuyog ti ulitegna.
Narekobre dagiti polis ti maysa a homemade pistol G12 shotgun nga awanan iti serial number ken maysa a kapsula iti chamber daytoy.
Naikustodia ti suspek iti police station para iti umisu a disposision.#
