Footer

Baro a napaltogan ti polis, dimmawat iti danios

STA, CRUZ, Ilocos Sur – Sangagasut a ribu a pisos ti dinawat ti biktima manipud iti polis a nangpaltog kenkuana gapu iti pannakaiyospitalna ket inikkanna daytoy iti dua a lawas a mangtungpal iti inisial a nagtulaganda.

Daytoy ti inisial a napagtulagan iti biang ti biktima a nainaganan Aries Dumag y Laborera, 29, baro, ken residente iti Barangay Pattiqui, Sta. Cruz ken ti nangpaltog kenkuana a ni PO1 Ronald Valdez y Javonillo, 26, baro, PNP member a naka-assigned iti RPSB 1 a nakabase iti 2nd Manuever Coy, Barangay Bio, Tagudin, Ilocos Sur ken residente iti Barangay Sagat, Sta. Cruz, Ilocos Sur tapno saanen a dumanon pay ti nasao nga insidente iti korte.

Segun iti report, madama ti panagraragsak da Valdez ken gagayyemna iti naangay a get together party iti Sunset Beach Resort sadiay Barangay Pattiqui, ditoy met laeng nga ili, idi rabii ti Hulio 5 idi simmangpet ni Dumag ket nagtugaw iti maysa a lamisaan iti asideg ti grupo.

Mapapati a binassawangan ni Dumag ti grupo ni Valdez ket kinompronta ti polis ti naud-udi a nagtungpal iti nabara a panagsubangda.

Mapapati nga innala ni Dumag ti bunengna iti backpackna sana dinarup ni Valdez.

Pinagtalna ti polis ni Dumag ngem saan nga intaltalek daytoy ket dimmarup latta a nakaigapuan ti panangasut ni Valdez iti paltogna sana pinaltogan ti biktima a nagsagrapan daytoy iti sugat iti makannigid a takiagna.

Naitaray ni Dumag iti Tagudin General Hospital ngem rimmuar met laeng kalpasan ti pannakaagas ti sugatna.

Kalpasan ti insidente, inyam-ammo ni Valdez ti bagina a maysa a polis ket insukona ti paltogna ken ni Palmero Vergara, kasinsin ni Dumag, a nangiyam-ammo met ti bagina a maysa nga opisial iti barangay.

Inawat ni Vergara ti paltog ngem mapapati nga aksidente a nakalbitna ti gatilio ket pimmutok daytoy. Mapapati nga imbaut ni Vergara ti paltog iti ulo ni Valdez a puon ti nakadunoran daytoy ken nakaiyospitalanna.

Nagresponde dagiti polis nga indauluan ni PI Marlon Lagman ken babaen ti direkta a superbision ni COP Chief Inspector Simon Damolkis kalpasan a nakaawatda iti report nga adda napasamak nga insidente ti pammaltog iti nasao a beach resort ket idi nakasangpetda, impaima ni Barangay Captain Jesus Gabatino kadakuada ni Valdez ken ti paltog daytoy a 9mm Glock 17 Gen 4 nga addaan serial number 38229, ken maysa a magasin a nagkarga iti 13 a bala.

Nakarekobre pay dagiti inbestigador iti maysa a kapsula manipud iti cal. 99 iti nakapasamakan ti pammaltog.

Iti pannakaisurat daytoy, naruk-atanen ni Valdez iti kustodia ti police station ditoy bayat nga agtultuloy ti panagimbestiga dagiti polis.#