Baro, napapatay iti vulcanizing shop

STA. MARIA, Ilocos Sur – Blangko a pader ti sangsanguen pay ti kapolisan mainaig iti pannakapapatay ti maysa a baro iti vulcanizing shop sadiay Barangay Poblacion Norte, ditoy nga ili idi agarup alas dies y media ti rabii ti Oktubre 1.

Iti report manipud iti polis ditoy, adda ni Christopher Antonio y Derro, 33, baro, ken residente iti nadakamat a barangay iti uneg ti vulcanizing shop a kukua ni Ebrahim Pantaleon idi kellaat a nagparang ti maysa nga armado a lalaki ket pinaltoganna ti biktima iti sumagmamano a daras.

Nabaelan ni Antonio ti nagtaray iti akinlaud a paset ti shop ket ditoy ti nakaidasayanna.

Iti panagimbestiga dagiti polis, nagsagrap ti biktima iti dua a sugat iti bagina a puon ti nakatayanna.

Mapapati a cal. 45 ti naaramat iti pammapatay kas maibatay iti maysa a kapsula ken deformed slug a narekobre ti SOCO team manipud iti Ilocos Sur Provincial Police Office iti crime scene.

Nupay nangiwayat a dagus dagiti nagresponde a polis iti dragnet operation para iti posible a naglibasan dagiti suspek ngem nakalusoten dagitoy.

Agtultuloy ti inbestigasion no asino ti nangisayangkat iti krimen ken no ania ti motibo iti pammapatay.#