Baro, napapatay

NARVACAN, Ilocos Sur – Maysa a baro ti sinurot ti armado a tao sana pinaltogan iti langalang a paset ti maysa a barangay ditoy nga ili idi agsapa ti Septiembre 21.

Napapatay ni Dennis Cabrerra y Lee, 19, baro, ken residente iti Barangay Orence ditoy nga ili bayat ti panagdaliasatna iti provincial road a sakup ti Barangay San Jose idi agarup alas 7:00 ti bigat ti Septiembre 21.

Segun iti report manipud iti polis ditoy, agpadaya a direksion ti biktima a nakalugan iti Suzuki Rider  a motorsiklona idi kellaat a nagparang ti suspek manipud iti likudanna a nakalugan met iti chop-chop a motorsiklo ket pinaltoganna iti sumagmamano a daras ti biktima a nakatamaan ti nadumaduma a paset ti bagi daytoy.

Tinarayan ti biktima ti motorsiklo ngem naidasay sumagmamano a metro ti kaadayona ket nagsatan ti anges iti akinlaud nga abaga ti kalsada.

Naglibas ti suspek nga agturong iti daya a direksion a kuyogna ti armasna.

Nakarekobre dagiti nagresponde a pannakabagi ti linteg iti maysa a kapsula manipud iti cal 45 iti nakapasamakan ti krimen.

Iti pannakaisurat daytoy, di pay ammo ti kinasiasino ti kriminal ken ti motibona a nangisayangkat iti pammapatay.#