Baro, natiliw iti buy-bust operation

STA. MARIA, Ilocos Sur – Nanabtuog ti maysa a baro iti buy-bust operation nga insayangkat ti kapolisan ditoy nga ili itay lawasna.

Inaresto dagiti polis ni Richard Ducay y Geronilla alias Gerly, 24, baro, ken residente iti Barangay Poblacion Sur, ditoy met laeng nga ili babaen ti insayangkatda a buy-bust operation sadiay Barangay Laslasong West idi agarup 10:30 ti aldaw ti Disiembre 18.

Nakakumpiska dagiti polis iti ikut ni Ducay ti dua a transparent plastic sachet a nagkarga iti mapapati a shabu, agraman ti dua a sag-P500.00 a naaramat iti buy-bust operation, 4 a sag-P100.00 ken maysa a Myphone a selpon.

Naipan ti suspek ken dagiti nakumpiska kenkuana iti estasion ti polis para iti umisu a disposision.#