Baro, natiliwan a nagisakbit iti paltog

CABUGAO, Ilocos Sur – Iti pagbaludan ti pangpalabasan daytoy lalaki iti Semana Santa gapu ta natiliwan nga adda sakbitna a paltog iti checkpoint dagiti polis iti Barangay Turod ditoy nga ili idi bigat ti Abril 4.

Nangipasdek dagiti polis iti checkpoint iti nasao a barangay kalpasan a nakaawatda iti impormasion manipud iti saan a nainaganan nga umili nga adda nakitana a nagtagipaltog a lalaki manipud iti Barangay Sabang a nagmaneho iti traysikel.

Iti agarup alas 9:00 ti bigat, nasaripatpatan dagiti polis ti suspek a nabigbig iti nagan a Mc Joe Soclo Saquiton, 32, baro ken residente iti Barangay Sabang, ditoy nga ili a nagmaneho iti RS Yamaha tricycle nga addaan iti plate number AT-1941 ket pinasardengda tapno rikisaenda.

Boluntario nga insuko ti suspek ti paltogna a cal .38 revolver (paltik) nga awanan iti serial number ken addaan iti uppat a bala iti chamberna

Naipan ti suspek iti police station para iti pannakapalutpotna.#