Baro, natiliwan iti akto a panagtakawna

VIGAN CITY – Natiliwan ti maysa a baro bayat ti panagtakawna iti maysa a pagtagilakuan iti tiendaan publiko ditoy siudad idi rabii ti Oktubre 5.

Naipiskot dagiti polis ken agbambantay iti tiendaan ni Ronnie Cuenta y Riveta, 20, baro ken residente iti Barangay VII, ditoy siudad ket narekobre ti tinakaw daytoy a 23 pedaso a Nestle Chuckie a mapattapatta nga agbalor iti P600.00.

Nasalamaan ni Jeffrey Angeles Pascua, agbambantay, ni Cuenta a mangikakaut iti imana iti nadadael nga steel door iti pagtagilakuan ti maysa nga Allan Ragasa sana inkabil ti nakautna a tagilako iti plastik bag .

Pinanggep ti suspek ti aglibas ngem kinamat da Pascua ken kakaduana sada nagpaarayat iti agpatpatrolia a polis.#