Baro, natiliwan nga agkalkalap iti puttot ti mayor

STA. CATALINA, Ilocos Sur – Natured daytoy a baro ta uray ti puttot ti mayor ditoy nga ili, inkurimedna latta ti napan nagkalap idi agsapa ti Oktubre 28.

Segun iti report, nasukalan ni Galicano Atillo y Fuentes, 59, naasawaan, caretaker iti resort ni Mayor Carlos Asuncion a masarakan iti Sitio Punta, Barangay Cabittaogan, Sta. Catalina, ti maysa a baro nga agnagan iti Willy Reintegrado, 23, residente iti Barangay Cabittaogan, nga agkalkalap iti fishpond ti mayor nga awan pammalubos daytoy idi agarup 4:30 ti agsapa ti Oktubre 28.

Nakumpiska ken ni Reintegrado ti maysa a fish net ken lames nga agdagsen iti sumurok kumurang 8 kilos.

Tinengngel ni Galicano ni Reintegrado sana impaima kadagiti nagresponde a polis.#
Paltog, naipalladaw iti irrigation canal

BURGOS, Ilocos Sur – Iti baet ti kampania ti kapolisan kontra loose firearms, adda latta dagiti natured nga agikuyog iti kolorum a paltogda iti panagrekoridada iti rabii.

Bayat ti panangiwayat dagiti polis iti checkpoint iti national road a sakup ti Barangay Poblacion Norte, Burgos, Ilocos Sur idi agarup 1:45 ti agsapa ti Oktubre 30, maysa a motorsiklo ti kellaat a nagsardeng iti agarup 50 metros manipud iti checkpoint.