Baro nga ABC President, agtugaw iti sangguniang panlungsod inton Hulio

VIGAN CITY – Sabalinton ti mangibagi kadagiti barangay captains ditoy siudad inton Hulio daytoy a tawen agsipud ta nabutosan a konsehal ti dati nga ABC President.

Iti eleksion idi Mayo 13, 2013, maysa ni ABC Federated President John Patrick Singson kadagiti nangabak a konsehal ditoy siudad.

Gapu iti daytoy, agbakante ti puesto ti ABC Federated President a mangibagi kadagiti barangay captains kas ex-officio member ti sangguniang panlungsod.

Kas ABC Federated vice president, ni Barangay Captain Edmund Supnet ti naital-o iti nasao a posision ken mangibagi kadagiti barangay captains iti sangguniang panlungsod iti sumaruno a tallo a tawen.#