Baro nga agsusukot ti kasona a theft, nagtakaw manen

GALIMUYOD, Ilocos Sur – No saan a maikulong, agtultuloy latta nga agtakaw daytoy a lalaki ta nagbalinen a sakitna.

Iti report manipud iti polis ditoy, ni manen Rodel San Jose y Gabayan, 18, awanan asawa, ken residente iti Barangay Nagsingcaoan, ti nagtakaw iti selpon ni Roberto Alibuyo y Reparejo, 60, naasawaan, ministro iti Iglesia ni Cristo a naireport a napukaw idi agarup 8:37 ti rabii ti Oktubre 6.

Iti inisial a panagimbestiga ti polis, pinanawan ni Alibuyo ti selponna bayat a makarkargaan iti Pastoral House ngem idi nagsubli, awanan daytoy.

Naduktalanna laengen a naikkat ti dua a blades ti jalousie ti tawa iti abagatan a paset ti balay.

Iti insayangkat dagiti opisial ti barangay a panagimbestiga, nabigbig ti suspek nga uray idi menor de edad pay ket agsusukoten ti rekordna iti panagtakaw.

Inannugot ti suspek a tinakawna ti selpon ti ministro ket insublina met laeng.

Nakakustodia ti suspek iti police station ngem iti rigatna, posible a mawayawayaan manen daytoy no saanen nga aginteres pay ti ministro nga agdarum kas napasamak kadagiti kallabes.#