Editorial: Baro nga akem ni VP Robredo iti kampania kontra illegal a droga | Tawid News Magazine - Weekly Ilocos News 📰

Baro nga akem ni VP Robredo iti kampania kontra illegal a droga

NASKEN nga iwaksi ti nakaro a pinnolitika dagiti opisial ti gobierno ti Pilipinas tapno masolbar dagiti nadagsen a problema iti pagilian pakairamanan ti panagraira ti illegal a droga.

Aniaman ti pudno a gapu ti panangdutok ni Presidente Rodrigo Duterte ken ni Bise Presidente Maria Leonor “Leni” Robredo kas co-chairperson ti Inter-Agency Committee on Anti-Illegal Drugs (ICAD), nasken ti panagtinnulong ti administrasion ken lider ti oposision tapno masulosionanen ti problema ti illegal drugs ta agdadata a saan a kabaelan ti agdama a gobierno a solbaren ti problema.

Iti panagsarita ni Robredo kadagiti kameng ti media, impalgakna nga inawatna ti posision nga indiaya ni Duterte, saan a gapu nga agtartarigagay iti posision, ngem tapno makatulong iti pannakaispal iti uray maysa a biag ken tapno mapagsungbat dagiti drug lords ken rinuker nga opisial iti nadara a kampania kontra illegal a droga. Impaganetgetna a madadaan isuna a mangibaklay ti supapak ti panangawatna iti posision tapno laeng makatulong iti administrasion iti nabatbati pay a panawen iti termino ti Presidente.

Adu dagiti naklaat iti panangawat ni Robredo iti panangdutok kenkuana ni Duterte kas ICAD co-chairperson ta maysa ti Bise Presidente kadagiti nainget a kritiko iti nadara a kampania ti gobierno kontra droga.

Sakbay ti pannakadutokna iti baro nga akemna, krinitikar manen ni Robredo ti nadara a kampania ti gobierno iti illegal a droga ta rinibun a biag dagiti nakettel a kaaduanna ket dagiti marigrigat ken nairamraman dagiti inosente, kabayatan a dagiti drug lords ken dagiti kakumplotda iti gobierno ket siwawaya. Indariragna a maisardeng koman ti nadara a kampania kontra illegal a droga, ken mapalubosan nga agimbestigar ti United Nations kadagiti report ti panaglabsing iti human rights iti illegal drugs war iti Pilipinas.

Narurod ni Duterte iti dayta a kritisismo ni Robredo, ket kinaritna a padasen ti Bise Presidente nga idauluan ti kampania kontra illegal a droga no agballigi daytoy a mangsolbar iti problema. Impalgak ni Duterte nga apointaranna ni Robredo kas Illegal Drugs Czar wenno kangrunaan a mangidaulo ti kampania kontra illegal a droga ket idi Oktobre 31, pinirmaanna ti appointment ni Robredo.

Adu dagiti timmaud a pattapatta iti panangdutok ni Duterte ken ni Robredo iti kinasinserona ta siguden a kameng ti gabitena ti Bise Presidente kas Housing Czar idi 2016, ngem naglusulos ni Robredo gapu iti saannan a pannakaawis nga agatender kadagiti cabinet meeting ta napabasol a nakikumplot kadagiti adda planona a mangpatakias ken ni Duterte iti posision. Naglibakan dayta ni Robledo ken kinompirmar idi ti Philippine National Police ken Armed Forces of the Philippines nga awan ti intelligence report iti ouster plot iti Presidente.

Nabingay ti kapanunotan dagiti kapartiduan ni Robredo iti Liberal Party ta adda dagiti immunan a nangipeksa iti saanda nga ikakanunong ta ibilangda dayta a palab-og a mangpaulimek iti Bise Presidente ket sumardengen a mangkritikar iti administrasion. Adda dagiti mamati a saan a serioso ni Duterte a mangipaay iti suporta ti administrasionna ken ni Robredo ken mausarto laeng a landek ti Bise Presidente iti pannakapaay ti kampania kontra illegal a droga. Insingasingda a saan koma nga awaten ni Robredo ti pannakadutokna ta amangan no saanto a suportaran wenno suroten dagiti opisial dagiti ahensia iti salinong ti ICAD.

Mairaman iti ICAD ti Philippine Drug Enforcement Agency, Department of Interior and Local Government, Department of National Defense, Department of Justice, Department of Finance, Dangerous Drugs Board ken dadduma pay nga ahensia ken departamento ti gobierno. Kadua ni Robredo kas co-chairperson ti ICAD ni PDEA Director General Aaron Aquino a nangipasingkeden iti suportana iti Bise Presidente.

Impasingked metten iti suporta ken ni Robredo iti baro nga akemna da Senate President Vicente Sotto III, Senate Minority Leader Franklin Drilon ti Liberal Party, ken Senador Panfilo Lacson a nangidiaya ti tulongna kas sigud a Chief ti Philippine National Police. Kiniddaw dagiti senador ti suporta ti administrasion ken ni Robredo, ken pannakaipakni pay laeng ti politika tapno agballigi ti kampania kontra illegal a droga.

Nakalkaldaaang nga iti laksid ti panangipaspasindayag ti administrasion a naballigi ti illegal drugs war ta nasuroken a 5,000 dagiti napapatay a drug personalities ken dandanin lima tonelada nga illegal a droga dagiti nakompiskar ket agtultuloy ti panagraira ti problema kas maipadpadamag iti inaldaw maipapan kadagiti mapappapatay ken matiltiliw a suspek ken adu a masamsamsam a droga kadagiti illegal drugs operations. Impanakkel idi ni Duterte idi panawen ti kampania a solbarenna ti problema iti illegal a droga agingga iti innem a bulan, ngem nagraira pay laeng agingga ita a nasurok laengen a dua a tawen ti nabati iti termino ni Duterte.

Agtultuloy ti problema ti panagraira ti illegal a droga iti Pilipinas ta kaaduanna a natiltiw ken napappapatay a drug suspects ket dagiti met laeng napanglaw ken awanan-gaway, kabayatan a dagiti drug lords, ninja cops ken dadduma pay a rinuker nga opisial ti gobierno ket nawaya a makikumkomplot iti pannakailako dagiti illegal a droga.

Ipaneknek dayta dagiti naglabas a nabara a kontrobersia a pannakaiserrek dagiti tinoleda a droga sadiay Bureau of Customs, dagiti agtultuloy nga illegal drug trade sadiay National Bilibid Prisons a sakup ti Bureau of Corrections, ti kaadda dagiti narcopoliticians, ken pannakainaig dagiti ninja cops iti operasion iti agaw-bato ken drug recycling ken dadduma pay a kaso.

Dagita nga insidente ket ipaneknekna a saan a patas ken epektibo ti kampania ti agdama nga administrasion kontra illegal a droga, ket nasken a mabaliwan ken manayonan ti estratehia ken wagas babaen ti panangawat ken panangipakat kadagiti baro a mangidaulo ken kapanunotan tapno masolbaren daytoy a problema a nangkettelen iti adu a biag ken agtultuloy a mangdaddadael iti kagimongan.