Footer

Baro, pinapatay armado a tattao riding in tandem

BANTAY, Ilocos Sur – Dandani makalawas kalpasan ti insidente ti pammaltog iti sanguanan ti maysa a videoke bar ditoy nga ili, sabali pay a pammaltog ti naisayangkat iti Barangay Guimod idi sardam ti Nobiembre 19 a nakatayan ti maysa a baro.

Dagus a nagudas ni Ryan Perez y Pespes, 24, baro, ken residente iti Barangay Guimod gapu kadagiti grabe a sugatna.

Segun iti maysa a saksi, naglibas dagiti suspek a nakalugan iti motorsiklo iti agpaamianan a direksion.

Nupay nangiwayat dagiti nagresponde a polis iti dragnet operation, nakalusoten dagiti di pay nabigbig a suspek.

Naammuan iti inisial nga inbestigasion nga idi agarup alas 7:40 ti sardam ti Nobiembre 19, kadisdissaag ni Perez iti bus a naglugananna iti sanguanan ti balayda idi kellaat a pinaltogan dagiti suspek.

Mapapati a sinurot dagiti suspek ti bus a nagluganan ti biktima ket idi dimsaag daytoy, pinalikudandan a pinaltogan.

Nakarekobre dagiti inbestigador iti uppat a kapsula a nagtaud iti cal. 45 iti nakapasamakan ti krimen.

Daytoy ti maikadua nga insidente ti pammaltog ditoy nga ili iti las-ud ti makalawas.

Tallo nga agkakalugaran ti napaltogan iti Butt and Balls Videoke Bar a masarakan iti Barangay Puspus idi agarup 1:20 ti bigat ti Nobiembre 13.

Pinaltogan ni Denmark Presto y Carpio, 18, residente iti Barangay Ora East, da Randolf Abigania y Rabe, 27, naasawaan; Alex Raboy y Arconado, 38, naasawaan; ken Ignacio Mendoza y Rabe, 38; agpapada a residente iti Barangay Fatima, Vigan City.

Naireport pay a nasugatan ti maysa a mapapati a kadua ti pimmaltog a nainaganan iti Rex Bilgera y Domenden, 29, ken residente ti Barangay Ora West.

Iti inisial a panagimbestiga dagiti polis, nagkukuyog dagiti tallo a biktima a napan imminom iti nasao a videoke bar ngem mapapati a kinompronta ida ti suspek a nakaigapuan ti panagriringgorda ken nagtungpal iti pannakapaltog dagiti biktima.

Iti kaudian a report, naipilan iti opisina ti provincial prosecutor ti kaso a double frustrated murder with attempted murder maikontra ken ni Presto.#