Baro, tinagbat ti kaanakanna

BANTAY, Ilocos Sur – Naiyospital ti maysa a bayog gapu iti panangtagbat kenkuana ti kabbalayna a kaanakanna sadiay Barangay Taleb ditoy nga ili idi rabii ti Nobiembre 11.

Agpapaagas pay laeng iti Gabriela Silang General Hospital ni Miguel Madriaga y Paa, 49, baro, gapu iti panangtagbat kenkuana ni Julius Madriaga y Aragon, 18, out of school youth, kabbalay ti biktima.

Segun iti polis, nakainom ti suspek a simmangpet iti balay ni Madriaga ket mapapati a natinnag ti selpon ti biktima bayat ti panag-charge ti suspek a puon ti saanda a panagkinnaawatan.

Bayat ti panagririda, nangala ti suspek iti jungle bolo ket tinagbatna iti sumagmamano a daras ti biktima a nakasugatan ti nadumaduma a paset ti bagina.

Saan a narekobre dagiti polis ti bolo a naaramat iti pannagbat.#