Barut ti elektrisidad, natakaw iti bodega

VIGAN CITY – Agatiddog iti 28 a metro ti barut ti elektrisidad a naireport a napukaw iti bodega iti compound ti maipatpatakder a balay ni Gov. Ryan Singson sadiay Barangay Bulala Centro, ditoy siudad a mapapati a natakaw idi karabian ti Disiembre 16.
Iti panagimbestiga dagiti polis, naikabil ti nasao a barut ti elektrisidad nga agbalor iti P10,000.00 iti bodega idi malem ti Disiembre 16 ngem naduktalan nga awanen daytoy idi agsapa ti Disiembre 17.

Segun iti polis, adda dagiti aso a naikabil a kas perimeter security barrier iti dayta a rabii.

Ngem kinuna dagiti stay-in workers a naturog iti bodega nga awan ti nadnadlawda a karkarna iti nagpatnag.

Patien ti kapolisan a nailibas ti barut iti nakalukat nga alad.

Nakikoordinaren dagiti polis kadagiti amin a junkshop iti Vigan ken kabangibangna nga ili nga ipakaammoda iti kapolisan no adda mapan aglako kadakuada iti barut ti elektrisidad.#