Footer

Basbassit ti kaso ti dengue ita a tawen

VIGAN CITY – Kinuna ni Bokal Jerry Singson a basbassit ti kaso ti dengue ita a tawen no maikumpara idi napan a tawen.

“…Ditoy probinsiatayo, medio makonkontroltayo ti dengue… nupay adda dagiti kaso ti dengue, saan a kas idi napan a tawen ti kaaduda,” kinuna ti bokal a chairman iti komite ti salun-at ti provincial board.

Kinuna ni Singson a ti sakit a  dengue ket saan laeng a problema ditoy probinsia no di iti intero a pagilian ket kasapulan a sumurot ti gobierno probinsial kadagiti programa ti salun-at ti nasional a gobierno kas ti pannakapugipog ti sakit a dengue.

Innayon ni Singson a tumultulong ti gobierno probinsial a mangipatpatungpal iti gannuat ti departamento ti salun-at a mangpaksiat iti dengue babaen ti operation pattog ken panagdaldalus iti paraangan tapno awan ti pagitlogan ken pagtaengan dagiti lamok nga agiwaras iti daytoy a sakit.#