Basketball clinic, naangay para coaches

VIGAN CITY –  Kinuna ti maysa a dati nga umaayam ken coach ti Philippine Baskelball Association nga importante ti panagsanay dagiti coaches iti basketball kas addang iti pannakapadur-as ti programa daytoy nga sports kadagiti probinsia.

“Basketball is a never ending study. Kailangang updated ka sa mga bagong ideas,” kinuna ni Eric Altamirano, dati nga umaayam ken coach iti PBA, ti kakaisuna a liga ti propesional a bumabasketbol iti sibubukel nga Asia.

Kinuna ni Altamirano a napintas  a pundasion ti seminar kadagiti mayat nga agbalin a basketball coaches ta adu dagiti teknik ken baro a kapanunotan a maadalda ditoy aglalo kadagiti saan a makabael a mapan agseminar iti Manila ken ballasiw-taaw wenno gumatang iti libro ken videos a mainaig iti basketball. 

Lima pulo ket pito a basketball coaches manipud kadagiti nadumaduma a probinsia iti Rehion I ken Cordillera Administrative Region (CAR) ti nakipaset iti kaunaan a Coaches Accreditation and Licensing Program ti  BAP-SBP a naangay  iti University of Northern Philippines gymnasium ditoy a siudad idi Pebrero 13-14.

Dimmalan dagiti partisipante kadagiti lectures, aktual a coaching exercise ken eksamen.   Kalpasan ti dua-aldaw a seminar, naikkan dagitoy iti akreditasion manipud ti BAP-SBP.

Kinuna ni Altamiro a kasapulan a  mangrugi kadagiti coaches ti panagbalbaliw tapno maisuro dagiti fundamentals kadagiti umaayam iti grassroots level ket “makapaaddatayo kadagiti umaayam a mabalin a dumanon kadagiti internasional a kumpetition”.

Kabayatanna, kinuna ni Ronilo Palma, regional director ti BAP-SBP,  a kasapulan ti panagsanay tapno makadiskubre kadagiti baro a talento ken maingato ti kalidad ti basketbol iti rehion uno nangruna ti probinsia ti Ilocos Sur.

Kinuna ni Palma nga in-inawenna ti maysa a torneo a pagsasalipan dagiti teams manipud iti amin a siudad ti Rehion I para kadagiti agtawen iti 16-25 a saan pay a nakapagay-ayam kadagiti big leagues iti pagilian.

“Maangay daytoy iti siudad ti Vigan inton Mayo. Iranatayo iti bakasion tapno ad-adu dagiti makapagpartisipar nga estudiante,” impalgak ni Palma.

Kinunana a tinto  mangabak iti nadakamat a pay-ayam ti mangibagi iti rehion iti nasional a torneo.#