Basketball clinic, naangay

VIGAN CITY – Nangangay ti maysa a propesional a team ti Philippine Basketball Association iti basketball clinic para kadagiti ubbing a basketbolista itay nabiit.

Dua gasut nga ubbing ti sinanay da Asi Taulava, Jojo Lastimosa ken Enrico Villanueva, umaayam iti North Luzon Express (NLEX) Road Warriors ti Philippine Basketball Association, maipanggep iti teknik iti panagsiut, panagipasa, panagguardia ken dadduma pay a paglintegan iti basketbol.

Naangay iti tallo nga aldaw iti People’s Stadium ditoy nga ili, kangrunaan a panggep ti nasao a clinic ti pannakaipasagepsep kadagiti ubbing ti sportsmanship ken disiplina iti bagi ken team work babaen iti basketbol.#