STO. DOMINGO, Ilocos Sur – Dakkel a buong ti ulo dagiti agindeg ditoy ti basura aglalo iti tiendaan.
Daytoy a problema ti naibaskag kabayatan ti taripnong dagiti kamkameng ti municipal development council (MDC) ditoy nga ili a naangay iti ABC Multipurpose Hall itay nabiit.
Dinar-ayan dagiti ag-36 a kapitan ti barangay ken sumagmamano nga opisial ti non-government organizations (NGOs) ti nadakamat a taripnong no sadino a ti kangrunaan a panggep ti pannakaangayna ti panangpili, panangarisit ken panangaprobar kadagiti priority projects a maipalaon iti annual development plan (ADP) para iti 2007.
Naidatag ketdi ti nasao nga isyo kalpasan a naaprubaran dagiti naipalaon a priority development projects iti ADP 2007.
Segun ken ni Konsehal Henry Palpallatoc, chairman ti committee on market and slaughterhouse, adu nga umili ti agrekreklamo gapu iti saan a sistematiko a panagibasura iti tiendaan ken ti di makaay-ayo nga angot a patauden daytoy.
“Uray ti drainage canal iti tiendaan, naim-imbag la koma no magaburanen yantangay di met laengen nga ag-function. Pagigabsuonan la ket ngaruden dagiti dadduma nga agtagtagilako ti nasao a kanal,” panangilawlawag ni Palpallatoc.
Pinasingkedan met daytoy dagiti dadduma a dimmar-ay a dadaulo ti NGO, no sadino nga imbaskagda met dagiti kapaliiwanda iti tiendaan pakaseknan ti problema iti basura.
Maipalagip a ti kaawan iti dumpsite ken sistematiko a panagibasura ti nabayagen a problema ken pakakumikoman ti gobierno lokal iti ili a Sto. Domingo.
Adda idi naituyang a pagbasuraan iti akindaya a paset ti ili ngem nagpetision ken sinupiat dagiti maseknan a bumarangay gapu iti pataudenna a di nasayaat a kas iti polusion ken layus gapu iti posible a pannakagabor dagiti asidegna a taltalon no panawen a matutudo.
Impanamnama ni Mayor Floro “Butch” Tadena nga ikkanda iti importansia ken tamingen ti gobierno munisipal nga idadauluanna ti pannakarisut daytoy a problema.
