Bataoil, pinadayawan ti grupo kontra korapsion, krimen

SAN FERNANDO CITY – Sabali manen a pammadayaw ti inawat ni Police Chief Supt. Leopoldo N. Bataoil, regional director – ti special award iti law enforcement manipud iti Volunteers Against Crime and Corruption (VACC).

“Diak ninamnama ti aniaman a pammadayaw manipud iti grupo a kas iti VACC, ngem agyamanak ta nakitada dagiti sakripisiotayo ken ti sibubukel a PNP,” kinuna ni Bataoil.

Naiyawat ken ni Bataoil ti pammadayaw itay Agosto 17 bayat ti 9th Founding Anniversary ti VACC a naangay iti PNP Multipurpose Hall iti Camp Crame, Quezon City.

Napili ni Bataoil kas special awardee iti tay-ak ti law enforcement para iti tawen 2007 kas pammigbig iti meritorious a serbisiona kas regional director ti Police Regional Office 1.

Kangrunaan a dinayaw ti VACC  dagiti nagapuanan ti regional police ditoy iti pannakasolbar dagiti political killings a pakairamanan ti pannakapapatay da Mayor Resuello ti San Carlos City, Pangasinan; Mayor Philip Velasco ken Councilor Marcelo Andaya ti Bacarra, Ilocos Norte; Vice Mayor Bonnie Apilado ti San Manuel, Pangasinan ken itay nabii, ti pannakapapatay ni  Felicidad Picar, tesorera ti Bauang, La Union.

Iti panangitedna iti pammadayaw ken ni Bataoil, inraman pay ti VACC dagiti naglabas a nagapuanan daytoy idi 2006 idi isu pay ti district director ti Northern Police District (NPD).

Kinuna ni Bataoil ket gapuanan ti amin  ti pammadayaw a naited kenkuana idinto nga innayonna a manipestasion iti panangipatungpalda iti linteg, iti panagballigida iti gubat ken iti panangkalbitda iti biag dagiti tattao nga inkarida a serbian nga awanan iti buteng ken pabor. (Danny Antalan)