Batch 6-10 ti kurso ti masahe, nagturpos

VIGAN CITY – Dua gasut tallopulo ket tallo a nagadal iti Basic Reflexology and Therapeutic Massage Course ti nagraduar itay nabiit iti Baluarte ditoy siudad.

Maibilang ti grupo iti Batch 6-10 a nagturpos idi Marso 23.

Kinuna da Caoayan Mayor Germelina Singson-Goulart ken Lidlidda Mayor Constante Segundo a bentahe dagiti nagturpos iti panagilut ta nadaras a maisapulda ti kursoda iti ballasiw-taaw.

Kinuna met ni Eduardo Tayco, dati a mangngilut, nga iti baet ti pammatina a nalaingen a mangngilut, adu pay gayam dagiti dina ammo a nasursurona.#