Bateria ti trak, tinakaw dagiti menor de edad

STA. LUCIA, Ilocos Sur – Uray bateria dagiti truck ti maysa a konsehal ti ili, saan a pakawanen dagiti mannibrong a takawen. Ket ti makadakes, pasig a menor de edad dagiti nasukalan a nagtakaw.

Idi bigat ti Enero 13, nagpulong iti polis ni Sangguniang Bayan Member Eduardo Toquero, residente iti Barangay Sabuanan, ditoy nga ili, a lima a bateria dagiti trakna ti natakaw a masuspetsa a naisayangkat iti rabii ti Enero 12.

Naduktalan ti pannakatakaw dagiti bateria idi saan a mapagandar ti maysa nga empleado ti konsehal ti maysa kadagiti truck.

Idi sukimaten ti empleado ti makina ti lugan, nakitana laengen nga awan ti bateria daytoy.

Idi sinukimatda dagiti sabali pay a truck, awan met ti bateriada.

Kalpasan ti panangireport ni Toquero iti pannakatakaw dagiti bateria ti luganna, sinaggaysa dagiti polis a pinasiar dagiti junk shops iti Sta. Lucia ken kaparangetna nga ili ket nabirokanda ti tallo a bateria iti Ruben’s Junk Shop sadiay Barangay Calaoa-an, Candon City.

Segun iti akinkukua iti nasao a junk shop, inlako ti maysa a Marcos (parbo a nagan agsipud ta menor de edad), 15, estudiante ken residente iti Barangay Sabuanan, Sta. Lucia, Ilocos Sur.

Natuntonan dagiti polis ti nasao a suspek ket bayat ti panangpalutpotda kenkuana, impalgak daytoy dagiti dua pay a kaduana nga agtawen iti 12 ken 13, ken kalugaranna iti Barangay Sabuanan met laeng.

Kalpasan ti dokumentasion iti nasao a panagtakaw, naited ti kaso iti Department of Social Welfare and Development para iti umisu a dokumentasion.#